مع بداية دخول الشتاء لازم ترتبي دولابك علشان تشوفي اللبس المناسب ولو في قطع لا تستخدم خرجيها من دولابك في أشخاص تانية تقدر تستفيد منها، وابدأي اجردي القطع الأساسية ونظميها بطريقة تقدري من خلالها تعرفي القطع الناقصة، النهاردة حقولك أهم 9 قطعة ملابس للشتاء يجب أن تكون بدولابك في الشتاء علشان توصلي لإناقة الشتاء المثالية بأقل التكاليف.
قطع ملابس للشتاء أساسية
في قطع ملابس لازم تكون في دولابك، طبعا مش لازم كلهم بس علي الأقل كل شتاء اهتمي أنك تشتري قطعتين علي الأقل من القطع الأساسية حتساعدك أنك تنسقي أكتر من طقم بيهم، منهم:
الفستان الصوف
بدء يظهر بدرجة كبيرة في الموسم الجديد تقدري تلبسيه بأكثر من شكل، ممكن مع جاكت جلد، أو بالطو، أو كاريجان، خصوصا لو كان لونه من الألوان السادة زي اللون الأسود، وتقدري تلبسيه الصبح وبليل حسب المناسبة.
البليزر
من القطع المميزة المناسبة لفصل الشتاء خاصة لو عندك ميتنج الصبح، تقدري تنسقي البليزر مع بلوزة صوف، واكسسوار مناسب حيكون شكلك أنيق.
الفيست الصوف
من القطع الأساسية بيدي فخامة للإطلالة خصوصا لو كان تحته قميص، مناسب كمان مع الحجاب.
حذاء رياضي أبيض
أهم قطعة في كل الفصول لأنك تقدري تلبسيه علي كل اللبس الكاجوال، اهتمي أنك تشتري الكوتشي الأبيض من ماركة معروفة علشان يكون مريح وتقدري تلبسيه في أيامك الطويلة.
جاكيت جلد
الشتاء يعني الجلد، لأن الجلد يعتبر من أهم الخامات المميزة في الشتاء، في الموسم الجديد لازم يكون عندك أي قطعة مصنوعة من الجلد سواء كان جاكيت تقدري تلبسيه مع بلوزة صوف، أو جيبة جلد أو بنطلون، لو قدرتي تشتري فستان من الجلد حيكون مميز في المناسبات.
البوت الطويل
البوت بيخلي الإطلالة مميزة بشكل ساحر، علي الأقل يكون عندك لونين من البوت الأسود والجملي، هتقدري تلبسيهم طول الشتاء بسهولة، اهتمي بجودة البوت علشان تقدري تلبسيهم علي الأقل 3 سنين خصوصًا لأن مدة الشتاء قصيرة، أفضل طريقة أنك تشتري الاتنين في العروض علشان توفري أكتر كمان زي عروض البلاك فريدي أو خصومات أخر الموسم.
السكارف العريض
أو الشال من القطع المهمة خصوصًا في بداية الشتاء، اختاري سكارف فيه ألوان كتيرة علشان تقدري تلبسيه علي لبس كتير عندك زي الفستان السادة أو البلوفر الصوف أو مع الجاكت بيخلي شكلك أنيق.
الكارديجان الصوف الطويل
من أهم القطع للمحجبات، كل الماركات بتعرض الكارديجان الطويل في الشتاء سواء بالألوان السادة أو بالألوان المتداخلة، حيكون مناسب أنك تعملي أكتر من إطلالة مع الكارديجان بتغير الحجاب أو الأكسسوار أو حتي الشنطة.
الكاب
قطع لها مظهر مختلف وأنيق لو الميزانية المخصصة للشتاء لا تسمح غير بشراء قطعة واحدة فقط، اشتري كاب شتوي حيكون قطع مختلفة لدولاب.
